17:33:56                         05.09.2010
ბრიტანელი ადამიანის უფლებათა დამცველები ბელორუსი ჟურნალისტის დაღუპვის გარემოებებით შეშფოთებულნი არიან

საბეჭდი ვერსია

ბრიტანელი ადამიანის უფლებათა დაცვის ორგანიზაციის “ცენზურის ინდექსის” წევრები ბელორუსი ჟურნალისტის ოლეგ ბებენინის დაღუპვის გარემოებებით შეშფოთებულნი არიან.

ოლეგ ბებენინი 4 სექტემბერს, თავის აგარაკზე მკვდარი იპოვეს. ბელორუსის შსს-ს ვერსიით, ჟურნალისტმა თავი მოიკლა.

ბებენინი ადამიანის უფლებათა ინიციატივის “ქარტია 97” ერთ-ერთი ლიდერი იყო და მას ბელორუსის ხელისუფლება დევნიდა. 1997 წლის აპრილში ის უშიშროების თანამშრომლებმა გაიტაცეს, 1999 წლის სექტემბერში კი, მას თავს მოფაშისტო ახალგაზრდები დაესხნენ, რომელთაც კავშირი სახელისუფლებო სტრუქტურებთან ჰქონდათ.

მოგვიანებით, ჟურნალისტმა საიტი charter97.org დაარსა, რომელიც მოსახლეობას ალტერნატიულ ინფორმაციას აწვდიდა. თუმცა, ორი თვის წინ ამოქმედდა ბრძანებულება #60, რომელიც ბელორუსში ინტერნეტის გამოყენებას მკაცრად არეგულირებს.

“ცენზურის ინდექსის” მენეჯერის მაიკ ჰარისის განცხადებით, ოლეგ ბებენინს გამოსათხოვარი წერილი არ დაუტოვებია. მეტიც, ჰარისის ინფორმაციით, სიკვდილამდე რამდენიმე საათით ადრე, ჟურნალისტმა მეგობრებს დაურეკა და მათ კინოში წასვლაზე შეუთანხმდა.

“ბოლო თვეების განმავლობაში, ოლეგი შეშფოთებული იყო თავისი კოლეგების უსაფრთხოებით, ეშინოდა, რომ განმეორდებოდა 1997-1999 წლები, როდესაც გაურკვეველ გარემოებებში, ოპოზიციონერები უგზო-უკვლოდ იკარგებოდნენ”, - აღნიშნა ჰარისმა.

რუსული მედიის ვერსიით კი, ბებენინი ბელორუსის სპეცსამსახურებმა მოკლეს.

Facebook TwitThis