10:19:10                         06.09.2010
ეკონომიკის სამინისტროში მორიგი აუქციონი გაიმართება

საბეჭდი ვერსია

დღეს საქართველოს ეკონომიკისა და მდგრადი განვითარების სამინისტრო გრძელვადიანი ტყითსარგებლობისათვის ხე-ტყის დამზადების სპეციალური ლიცენზიის გასაცემად მორიგ აუქციონს გამართავს.

სამინისტროს ცნობით, აუქციონზე მხოლოდ ერთი სატყეო უბანია გატანილი, რომელიც იმერეთში, ვანის რაიონის სოფელ ყუმურის ტერიტორიაზე მდებარეობს. ლიცენზიის მფლობელი წიფლისა და თხმელის მერქნის მოპოვებას შეძლებს. მისი საწყისი გასაყიდი ფასია 299 671 ლარი, მოქმედების ვადა კი – 10 წელი.

აუქციონში გამარჯვებული ვალდებულია, დაიცვას ლიცენზიით განსაზღვრული ტერიტორია უკანონო ტყითსარგებლობისაგან; საქართველოს კანონმდებლობით დადგენილი წესით აღკვეთოს და შესაბამის ორგანოებს დროულად გააცნოს ინფორმაცია ლიცენზიით განსაზღვრულ ტერიტორიაზე უნებართვო საქმიანობისა და სამართალდარღვევათა შესახებ; ლიცენზიის მიღებიდან არა უგვიანეს 12 თვისა გარემოს დაცვისა და ბუნებრივი რესურსების სამინისტროში დასამტკიცებლად წარადგინოს მოქმედი კანონმდებლობის საფუძველზე შედგენილი ტყით სარგებლობის გეგმა და სხვა.

Facebook TwitThis